Surah As Sajdah Ayat 17 Urdu Translation Tafseer

Para 21 - اُتْلُ مَاۤ اُوْحِیَ

سورة السجدة

Audio PDF

بِسْمِ اللّٰهِ الرَّحْمٰنِ الرَّحِیْمِ

32.17

فَلَا تَعْلَمُ نَفْسٌ مَّاۤ اُخْفِیَ لَهُمْ مِّنْ قُرَّةِ اَعْیُنٍۚ-جَزَآءًۢ بِمَا كَانُوْا یَعْمَلُوْنَ(17)

Kanz ul Iman Kanz ul Irfan

کنزالعرفان

تو کسی جان کو معلوم نہیں وہ آنکھوں کی ٹھنڈک جو ان کے لیے ان کے اعمال کے بدلے میں چھپا رکھی ہے۔

تفسیر : ‎صراط الجنان

{فَلَا تَعْلَمُ نَفْسٌ: تو کسی جان کو نہیں معلوم۔} اس آیت کا معنی یہ ہے کہ جنت کی نعمتیں آدمی کے تصور سے بڑھ کر ہیں ۔ اللہ تعالیٰ نے ایمان والوں کے لئے نیک اعمال کے بدلے میں کیسی کیسی آنکھوں کی ٹھنڈک چھپا رکھی ہے کسی جان کو اس چیز کا تفصیلی علم نہیں ۔

جنّتی نعمتوں سے متعلق دو اَحادیث:

آیت کی مناسبت سے یہاں جنتی نعمتوں سے متعلق دو اَحادیث ملاحظہ ہوں :

(1)… حضرت ابو ہریرہ رَضِیَ اللہ تَعَالٰی عَنْہُ سے روایت ہے،نبی کریم صَلَّی اللہ تَعَالٰی عَلَیْہِ وَاٰلِہٖ وَسَلَّمَ نے ارشاد فرمایا: ’’ اللہ تعالیٰ فرماتا ہے کہ میں نے اپنے نیک بندوں کے لئے ایسی نعمتیں تیار کر رکھی ہیں جنہیں نہ کسی آنکھ نے دیکھا،نہ کسی کان نے سنا اور نہ ہی کسی انسان کے دل پر اس کا خطرہ گزرا۔‘‘اگر تم چاہو تو یہ آیت پڑھ لو: ’’ فَلَا تَعْلَمُ نَفْسٌ مَّاۤ اُخْفِیَ لَهُمْ مِّنْ قُرَّةِ اَعْیُنٍ‘‘۔(بخاری، کتاب بدء الخلق، باب ما جاء فی صفۃ الجنّۃ وانّہا مخلوقۃ، ۲ / ۳۹۱، الحدیث: ۳۲۴۴)

(2)… حضرت مغیرہ بن شعبہ رَضِیَ اللہ تَعَالٰی عَنْہُ سے روایت ہے،حضور اقدس صَلَّی اللہ تَعَالٰی عَلَیْہِ وَاٰلِہٖ وَسَلَّمَ نے ارشاد فرمایا: ’’حضرت موسیٰ عَلَیْہِ الصَّلٰوۃُ وَالسَّلَام نے اپنے رب عَزَّوَجَلَّ سے دریافت کیا:اے میرے رب! عَزَّوَجَلَّ، سب سے کم درجے کا جنتی کون ہو گا؟ اللہ تعالیٰ نے فرمایا’’ایک آدمی ہو گا جو تمام اہل ِجنت کے جنت میں داخل ہونے کے بعد آئے گا۔ اس سے کہا جائے گا:داخل ہو جا۔وہ کہے گا:میں کیسے داخل ہوں حالانکہ تمام لوگ اپنی اپنی جگہوں پر پہنچ چکے اور انہوں نے جو کچھ لینا تھا وہ لے لیا۔ اس سے کہا جائے گا’’کیا تجھے یہ بات پسند ہے کہ تجھے اتنا دیا جائے جتنا دنیا میں کسی بادشاہ کے پاس تھا ؟وہ عرض کرے گا:اے میرے رب! عَزَّوَجَلَّ، ہاں ،مجھے یہ پسند ہے۔اس سے کہا جائے گا: تجھے اُتنا دیا گیا اور اس سے تین گُنا زائد بھی ملے گا ۔وہ عرض کرے گا:اے میرے رب! عَزَّوَجَلَّ، میں راضی ہوں ۔ اس سے کہا جائے گا’’تجھے یہ سب کچھ اور ا س سے دس گنا مزید دیا جائے گا۔وہ عرض کرے گا:اے میرے اللہ! عَزَّوَجَلَّ، میں راضی ہوں ۔اس سے پھر کہا جائے گا کہ ’’اس کے علاوہ تجھے وہ کچھ بھی ملے گا جس کا تمہارا جی چاہے اور جس سے تمہاری آنکھیں ٹھنڈی ہوں۔( ترمذی، کتاب التفسیر، باب ومن سورۃ السجدۃ، ۵ / ۱۳۷، الحدیث: ۳۲۰۹)

Next Ayat Prev Ayat